USA MIZO ṬHALAITEN MYANMAR SIPAI AN DEM TAK ZET

(Mizo Youth of America Strongly Condemn Myanmar's Military Coup)

By Editor, The MIZO

The MIZO hian hetiang lam hi kan tichhuak ngai lo va; amaherawhchu, tun ṭuma thil thleng erawh hi chu loh theih loh thil pakhat a nih miau avangin, kan tih ṭhin dan kal pelin kan ti ta a ni. March 7 - 13, 2021 chhung khan, The MIZO chuan USA state 13-a Mizo ṭhalai 150 chuang be pawpin hetiang hian Mizo-American ṭhalaiten Myanmar sipai an demna thlalak hi kan rawn tichhuak ta a ni.-Ed.

USA Mizo ṭhalaite hian February 1, 2021-a Myanmar sipaiin mipui thlan tlin ram hruaitute kut aṭanga thuneihna a hnehchhuh pawng lakna leh rawng tak leh rawra taka a chet chhunzawm zelna hi, engti kawng maha pawm rem theih chi niin an ngai lo va, Myanmar sipai an dem tak zet a ni.

Myanmar sipaite hi eng ram, sakhua, hnam leh pawl dan mahin a pawm theih loha rawng leh rawra-in an che a, dan tam tak an bawhchhia a ni.

USA Mizo ṭhalaite hian Myanmar mipuite an tawrhpuiin an lainat tak zet a, tharum tel lova huaisen taka zalenna sualtute an ngaisangin an thlawp tlat a, an pi leh pute, an nu leh pate, an u leh naute leh an ṭhenrual ṭhate chenna ramin hun thim tak a tawk mek hi an veiin an ngaihtuah em em a ni.

Mizo (Zofa) tam tak chen mekna Myanmar hi sipai awp behna ata tal chhuak a, kum tam tak mipuiin an lo beisei tawh, mipui rorelna sawrkar dik leh tluantling (Democracy) ding chhuak ngei turin an beisei tlat a ni.

Kum 1935 aṭang khan Mizote hian America leilung an rap ṭan a, tunah chuan October 19, 1985-a din 'Mizo Society of America' hnuaiah member 4000 vel zet an awm tawh a ni.

A hnuaiah hian USA Mizo ṭhalaiten Myanmar sipai chet dan an demna leh duh lohna an lantirna thlalak kan rawn tar chhuak e-