Ram Tana Nun Hlantu Ropuiliani

By Lalhrima Sailo

A Pian leh Murna: 

Lal ropui Lalsavunga, Aizawl lal fanu Ropuiliani hi kum 1828 vel khan a piang a, unau pariat zinga a palina a ni. A pa in hmun chu tuna Mizoram Governor Compound hi nia hriat a ni a, hetah hian Ropuiliani hi a seilian a ni.

Kum 1847 khan chhim lal ropui Vandula nen an innei a. Amah hre chiangtu a tunu Sawikungi sawi danin, Ropuiliani pasal nei hian thuam thul tam tak, chhiahhlawh tam tak leh tangkaraw thirfian a chhawm a, a lawi kawng khaw lalte chuan ruai ropui tak an lo ṭhehsak zel a, a pasal tur Vandula khua Belpui, Zobawk ram ami a thlen meuh chuan thla hnih a ral hman a ti.

A Pasal Vandula Chanchin: 

Tlutpawrha fa pangate chu lal ropui tak an ni vek a, a upa ber Vandula phei chu Bawrhsap Tarmita (J.Shakespeare) pawhin "Head of South Lushai" a tih hial a ni. Khaw hrang hrang Belpui, Kawmzawl, Ralvawng, Aithur, Hnahthial leh Denlungah te an insawn kual ṭhin. Ropuiliani nen hian fa pariat an nei a ni. Hman lai Mizo lal dangte ang lo takin Vandula hian hmei pawh a nei lo va, an nupa hian an inhmangaihin an lungrual dun em em a ni. Tlang hrang hrang an ṭhut hnuah, kum 1885 vel khan Ralvawng aṭangin Denlungah an kai a, Denlung hi an nupaa an awm dunna hnuhnung ber a ni. Denlunga an awm lai hian an fapa naupang ber Lalṭhuama, Mualṭhuam lal pawhin a nu leh pa hi a va kan fo ṭhin. Lalpa Vandula chu kum 1889 ṭhal lai khan a thi ta a, a ruang chu kuanga urin Denlungah an phum a, a thlanah lungdawh zau tak, a tlanga kal kuala pen 57-a zau an dawh a, chu chu Vandula Lungdawh tih a ni. He lungdawh hi Mizoram buai, kum 1966 thleng khan ṭha takin a la awm a, a hnu lamah a riral zo ta a ni.

Ropuiliani'n Vailian A Do: 

Ropuiliani a hmeithai hnu khan Vailian vawi hnihna chuan Mizo lal tam tak an titlawm a. Ropuiliani leh a fapa Lalṭhuama te erawh chuan Vailian laka tlawm an tum lo hle a, Ropuilian chuan, "Kan Ram hi an ta a ni lo va, kan ta a ni," a ti tlat a, tlang hrang hranga lal a fate pawh a thunun thei hle a. Amaherawhchu sawrkar an chet nat tak em avangin, Vandula thlah khaw ṭhenkhatte pawh chu an dul ta deuh a, Ropuiliani ngaih dan erawh chu a ni lo hle. A fapa indang tawh Lalṭhuama nen chuan inthurualin, Vailian do dan tur ringawt an ngaihtuah a, "Haw turin kan ti ang a, an duh loh chuan kan kap chhuak reng reng ang," an ti sauh sauh a, an khuaa silaite pawh chu an thukru a. Hmarlam lal Kairuma, Zaduna leh Chawngtleng lal Dokhuma te nen inthurualin vai do dan tur an rel ṭhin a. Amaherawhchu a thurualpui Kairuma leh Zaduna te pawh chuan sawrkar lakah an hminsan leh ta a ni.

Ropuiliani leh a fapa Laṭhuama te erawh chu sawkar lakah an khauh telh telh a, Lunglei beih an tum thu te pawh sawrkar beng a thleng ta hial a. Sawrkarin puak phur tur kuli a kohte pawhin ani chuan, "Ka khua leh tuite vai puak phurh ka phal lo," a ti tlat a, chhiah an rawn khawn te hian, "Lal ka ni a, ka lakah miin chhiah an chawi zawk tur a ni," a tih tlat zel avangin, Bawrhsap Tarmita (J. Shakespeare) pawh a lungawi lo hle a. Kawng hrang hranga an thlem hnu pawha an nufaa an hmin duh tlat loh avangin, Lalṭhuama chu tan inah an khung ta hial a, mahse a lo chhuah leh hnu pawhin a la ruh deuh deuh a ni. Sawrkarin Rahsi-a an hman, Satinkhara leh Dara te pawhin vawi tam tak an thlem a, mahse Ropuiliani chuan, "Hei hi ka ram a ni a, engvang nge ka ram chhungah min rawn tihbuai, anmahni hi an let leh tur a ni. Nangni vai chhiahhlawh, mahni ram pawh hum ngam lo, mi dawihzepte hian ka khua leh tui hi rawn pal fo tawh suh u, in hmel pawh hi ka hmu duh lo ve," a lo tihkhum phiar phiar ṭhin a, beidawngin an hawnsan leh ṭhin a ni. Chumi hnu chuan Bawrsap Tarmita chuan, a pasal Vandula nau Seipuia leh Lallula te chu Ropuiliani thlem turin a tur ve leh ta a. Anni pawh chu a lo be duh miah lo a ni.

Satinkhara Thah A Ni: 

Sawrkar Rahsi Satinkhara chu February ni 15, 1892 tuka Hnahthial aṭanga Aithur pana a kal laiin, Ropuiliani pasalṭha Hnawncheuva'n a kap hlum ta a, hemi tuk hian a fapa Lalṭhuama pawh Hnahthialah a awm a ni (Hei hi sawrkar lehkhaah pawh chiang taka ziah a ni).

Ropuiliani An Man: 

Heng thilte avang hian Bawrhsap Tarmita chuan sipai tam tak hruaiin August ni 8, 1893-ah Denlung khua chu an hual a, Ropuiliani leh a hnena lo zin mek a fapa Lalṭhuama chu an man ta a. Lunglei an panpui dawn chuan Tarmita chuan pitar tan ina han hruai tur chu nuam a ti lo hle a, sawrkar lakah tlawmin thil engkim inpuang duh sela, tantir loh mai pawh a duh a ni. Amaherawhchu Ropuiliaini chuan a Ram phatsana sawkar kuta inpek chu a duh bur loh avangin Lungleiah chuan an hruai ta nge nge a. An kal dawn chuan, "Ke-in ka kal duh lo," a tih tlat avangin Lunglei thleng an zawn ta a ni.

Sawrkar chuan Lungleia dah chu him tawka a hriat loh avangin March ni 8, 1894-ah Chitagong an panpui ta a, March ni 18, 1894-ah Chitagong tan inah an dah lut ta a ni. European tang ang chiahin an enkawl a, eitur tuihnai leh ṭawng lettu te pawh an pe a, amah vengtu tur pawh an dah hrang bawk a, lal taka enkawl a ni. A kum te a lo tam tawh avangin, dama haw leh a inbeisei lo viau a, a fapa Lalṭhuama hnenah chuan, "Taite, eng pawh ka tawk a nih chuan, ka ruang hi Denlung-a i pa thlanah min dah ve dawn nia," tiin a chah a, January ni 3, 1895 zingah a thi ta a ni. Ama insawi danin kum 60 vel a ni a, sawrkar thuneitute erawh chuan kum 70 vel hmel a pu an ti thung. A ruang chu ṭawih thei lovin an siam a, lawngin Tlabung thleng an phur a, heta ṭang hian a khua leh tuiten an rawn la a. Ram tana a thih thlenga huaisen taka tuar chhuaktu lalnu Ropuiliani chu, ama duhthu ang ngeiin Denlung-a a pasal Vandula bulah an phum ve ta a ni.

A Thlan Hai A Ni: 

Vandula leh Ropuiliani thlan hi Hnahthial Group YMA leh an thlahten June ni 18, 1997 khan an hai hawng a. Ropuiliani ruang chu lungrem ṭha tak chhungah zalh a ni a, dar kawnghren a hreng a, pawnfen dum nawi ni awm tak a hnuaiah a tla nuai bawk. A mutna zawnah chuan buara zainawi ni awm tak a awm ṭeuh bawk a, a awm zawnah sap no var, a pawla par leh thianghlim tak a awm a, a lu bulah chuan lehkhabu inches 6 vela sei, a ziak chhiar theih tawh loh, sap ṭawnga ziak niawm tak a awm a, a chungah chuan tuibur lian tak a awm bawk a ni.