Pialralah Chuan (Pu Vana Rorel Khawl)

By Romuanpuii Zadeng

Pu Lalruanga-te nupa chu Pu Vana chuan a lo ko va. An hmelma kumhlun țhin Pu Thlihranthanga-te nupa pawh an lo awm ve a. Hmânah kha chuan an inhaw hle țhin kha a ni a. An ngaihtuahna an han sâwr bing ngat ngat pawh chuan an lo inhaw thei ta reng reng lo mai a.

Pu Vana chuan an piah lawka 'Hmun hring dêl' lam chu kawkin, Pu Lalruanga-te fapa Tuaisiala leh, Pu Thlihranthanga-te fanu Kêlchawngi hlim tak maia, 'Thuțha rah' lova lo nui dun rawi rawi chu a kawh hmuh a.

An fate ve ve an va hmu chu mak an tichiang kher mai le! An fate kha hmânah kha chuan thâwk khat lai khân na takin an inkawp ve ngei kha a ni a. Mahse, kum upa tawh tak, tu mawng bêng rual an nih thleng khan, inhmel duh âwm pawh khan an awm tawh ngai reng reng lo kha a ni si a.

An pahnih chuan leiah khan kum upa tawh tak ve ve kha an ni si a, râwl thar hmêl tûai sar niin, Pu Vana'n a koh tâk avanga an lam pana inkâi rial rial paha an rawn hnai det det chuan, an nu leh pate ve ve an rawn hmuh chuan, an inthlahrung lek lek a.

Pu Lalruanga nupui chuan a fapa chu, "Tuaia, Kêlchawngi kha i thlah daih tawh emaw tia!?" mak ti tak hian a pasal pawh ngaichâng hman tawh lo chuan a lo zawt nghal phawng a.

Pu Thlihranthanga nupui pawh chuan a fanu chu "Chawngpui, Tuaia kha i haw hle tawh ni khân ka lo hre țhin si a. Eng nge thil awmzia hi ni ngai le!?" a ngaihna hre lo tak chuan a lo ti ve hâwl hâwl bawk a. An pasal te ve ve chuan an zawhna pawmpui nan lu an lo bu ve nghat nghat bawk a.

Pu Vana chuan, Tuaisiala leh Kêlchawngi-te darah kuahpah chuan, "Nangni an nu leh pate hian, in fate thinlung kha in hmu tlang thei țhin si lo va. Kei chuan, chhuat âwngah bihin, ka lo thlîr reng țhin a. He hmunah hi chuan, an kâra daidanna bang zawng zawng kha chhut chaha awmin, an thinlung thuhmun, inzawm tlat kha an nunpui ve tawh dawn a ni e," a lo ti a.

An nu leh pate chu a ngaihna hre lo tak chuan an fate leh Pu Vana chu en tawn zak zak pah chuan an inmelh tawn zawk zawk a.

An rilru hria chuan Pu Vana vêk chuan, "An thinlung duh dan te an theih tawpa nangni nu leh pate an hrilh lai cheu khân, pawmpui ahnêkin, in thinlung natzia leh in thinurzia kha an hre thiam êm êm a. Nangni thinlung tihnat zui zel ai chuan, an thinlung chu an phatsan ta a nih kha," a lo ti a.

An nu leh pate chuan,"Fel fai tak khan an inthlah emaw tihnâk alaiin!" an ti a. An fate chu hre thiam lo takin an en hau a.

Pu Vana bawk chuan, "Anni pahnih hlimna thlentir duh avang ringawt a, nangni nu leh pate thinlung țahtir âi chuan, in duhthusam ang ngeia awm a, in ngaihngamna tur ang taka inthlah a, inhaw tak anga hringnun hman mai kha an thlang ta zawk a ni. Anni chuan, in hlim nan an thinlung hmangaihna an vûi liam a. An khawvel ve chu, in hriat thiampui bâkah khân an lo insûn ral tawh zawk a," a lo ti dap dap a.

Pu Lalruanga chuan, "Chutiang tak rilru pûte chu, an tlân dûn mai ngâi a," a lo ti thuai a.

Pu Vana chuan a lo chhân khalh leh a. "An pahnih khân vawi tam tak an sawi dûn ve a. Thu awih lohna ațanga nu leh pate hnehtu nih chu an duh lo va. Thu âwih taka an hlimna thlentu nih kha, nu leh pate hrehawm tawrhtir ai chuan an thlang ta zawk a ni," a lo ti leh a.

Tuaisiala chu rawn țawng chhuak vein, "Hmangaihna chu nu leh pate tawrhna thlentu tur ni lo vin, thlamuantu a ni zawk tur a ni. Eng hmangaihna mah hi, tu nunna thleng nân maha hlû a awm lo. Hmangaihna dik tak chu, tuar turin a inpe ngam zawk țhin. Lo innei ta ila chuan, nangni zîngah hian rilru nat luat vanga nunna chân phah kha in awm hial thei hmel si a. Kan la naupangin, kan tuar chhuak thei zawk dawn tih kha kan hre chiang em a ni," a rawn ti ve ta a.

An nu leh pate chuan, an fate nun an lo hriatpui thiam lo lutuk leh, an pawn lam nui hmel phêna thu rûk chu an hmuh phâk lohzia an inhre chiang ta hle a.

Pu Vana chuan a rorelna chu lek kângin, "Tunah chuan, he hmunah hian, an inneih in rem tihpui theih lohna chhan zawng zawngte kha, a awm ve tawh lo va. Nu leh pate, chhung leh khat, u leh nâute lungawi zawkna tura nung reng chunga an vui liam tak, anmahnia nung reng, an inhmangaihna chu, eng mah rengin a țhen hran leh ngai tawh loh turin kumkhuain an nunpui tawh dawn a ni. Eng mah rêngin a țhen hrang leh ngai tawh lo vang. An hlim kumkhua tawh dawn a ni," tiin hlim takin kut a benpui ta dar dar a.

Ngâi chunga țhen tak lungduhte nen, chu hmunah chuan kan lêng tawh ang a. Eng mah rengin min țhen hrang leh ngâi tawh lo vang. A va'n ropui dawn em!!!