Mizo Society Of America Din Ṭan Dan Leh Mizo Day Lo Pian Chhuah Dan

By Ronald Sapa Tlau & Lalnunmawii Sailo

Zofate nunphunga bet leh kan hnam zia hre chiangtu hnam dangten an rawn awh fo ṭhin pakhat chu, kan hnam inpumkhatna hi a ni awm e. Pian leh murna inhriatsak ngai lo te, thisena inzawmna nei hauh lote pawh a hminga 'Mizo' nih ve ve tawh phawt chuan, mi thiam leh mi mawl, mi hausa leh mi rethei karah daidantu awm hauh lo angin kan eiin kan in ho tlang thei zel a. Hei hi kan duh vang leh tum ve reng vanga tih pawh ni lo, kan pianpui ve reng a ni lehnghal a. Hetiang taka Zofate zinga inngainatna leh inpumkhatna thinlung a awm avang hian Washington, DC-a Mizo lo inbengbel hmasate pawh khan an theih ang tawkin bul ṭanna ṭha tak an lo sial a ni.

Washington, DC leh a chhevelah Zofate lo pung zelin, mumal nei zawk leh ṭha zawka inphuar khawm leh hma lak theih duhna a lo pung zel a. Kum 1985-a Misty Mount hmuna Mizo Community Camping-a Pu Lalthangliana Sailo-in pawl din rawtna a siam chu, October 5, 1985 khan Pu Vanrotluanga Vangchhia inah ngun taka ngaihtuah hona neih a ni a. Chumi ṭuma Mizo kal khawmte chuan pawl din chu lungrual takin an rel thlu ta a. A hnu kar hnih leka an inkhawm lehna (10/19/85)-ah chuan Zofate chanchin chhuinaa pawimawh kumkhua tawh tur, 'Mizo Culture Society of America' (M.C.S.A.) chu a lo piang ta a ni. Chumi zana kal khawmte chu an phur tlang hle a, an zinga pa ngawichawi ber Pu H. Malsawma meuh pawh a phul ve nasa hle. Chumi zana an hruaitu thlante chu: President- Lalthangliana Sailo; Vice President- Rohlira Ralte; Secretary- Ronald Sapa Tlau; Assistant Secretary- Lallianzuali; Treasurer- Tlangchangliani Poey-te an ni. Tin, he'ng bakah hian Executive Committee Member-ah H. Darrikhuma, H. Heikai leh Sangi Tluanga-te thlan an ni bawk. Mizo Youth of America Chairman leh Washing Mizo Religious Committee Chairman-te chu Ex-Officio atana sawm bawk an ni. November 24, 1985-ah President hmasa ber Pu Lalthangliana Sailo inah MCSA din lawmna neih a ni a, hemi ṭum hian MCSA Constitution nemngheh nghal a ni.

MCSA thil tum tlangpuite chu: 'Mizo tlawmngaihna' leh kan hnam nun mawi tihvul leh theh darh te, a member-te zinga inlaichinna ṭha zawk siam te, USA leh a chhehvela Zofate inkara inhriat pawhna kawng ṭha dap te, zirna, khawsak dan leh hnam nunphung tihchangkanna lama hmasawn dan kawng dap te, Zofate leh hnam dang inkara hnam nun leh hnam dan inentir tawnna buatsaih te leh USA-a Mizo lo kalte a ṭul ang anga ṭanpui leh an cham chhunga nuam tak leh hlawk taka lo siam dan ngaihtuah te a ni.

Kum 1986-a Mizoram-in Peace Accord leh Statehood a lawm ṭum khan, Maryland leh Washington, DC chheh vela Mizo awmte chuan a lawmna buatsaih ve an duh a. Tichuan, Program tur te a duang ta a, a lawmna ruai atan bawng talha a chek ngei hawp an tum ta a ni. Pu Lalthangliana Sailo, a nupui Pi Lalnunmawii Sailo leh Tv. Ronald Sapa Tlau (hetih hun lai hian a la tlangval)-te chu bawng talh tur zawngin an feh chhuak a, a va hmu ta ngei a. Amaherawhchu, a talhna hmuna talhtir tur a nih bakah, chutih hun lai chuan a kawchhung paih vek ṭhin a ni. Tv. Ronald Sapa Tlau chu sa khawchhung dilin a va kal a, "Millionaire nih in duh em?" a va ti phawt a, ran taltute chu an phawk hra hlawm. "He'ng sa kawchhung in paih mai mai ṭhin hi mi tam takin sa tui bera kan ngaih a ni a, paih mai mai loin hralh ula pawisa tam tak in hmu ang," a ti ta a. Tichuan, sachek chu an hawp thei ta ngei a ni.

Pu Darrikhuma inah 'Remna leh Muanna' chu urhsun taka lawm a ni a, an zinga upa ber Pu Hengkaia'n ribbon a chep chhum a ni. Mahni hnam incheiin an inchei a, mipaten diar khimin puan an veng hlawm a. Mizo infiamna - insukhawlh, inbuan leh inhruipawh te an nei a, hun hlimawm tak an hmang a ni. He 'Remna Ni' lawmna aṭang hian ngaih dan lian tak a lo chhuak a, hnam dang kara sei lian zel tur an faten Mizo hnam dan leh nunphung an theihnghilh loh nan, Mizo hnam puan sina hnam dan inzirtirna, hnam lam leh hla sak hona leh intihhlimna hun neih ziah ṭhin ṭha an ti a. Tichuan, committee dinin kum tina 'Mizo Day' lawmna nei ṭhin tura rel a lo ni ta a ni.

(He thuziak hi 1986 MYA Annual Magazine-a Ronald Sapa Tlauziak 'Mizo Culture Society of America Chanchin' leh Lalnunmawii Sailo ziak 'Mizo Society of America Inṭan Dan leh Mizo Day Inṭan Dan' (Unpublished) aṭanga phuah khawm a ni. Lalnunmawii Sailo hi MSCA President hmasa ber - Pu Lalthangliana Sailo nupui a ni. 'Mizo Culture Society of America' hi a din aṭanga kum rei lo te hnuah, remchang zawk leh ṭha zawk nia hriatna avangin, 'Mizo Society of America' tia a hming thlak a ni. Hming thlak kum erawh kan hre thei ta lo. Kum 1983 vel khan Washington, DC chhehvela Mizo ṭhalai tlem te awmte chuan pawl an din a, a hmingah 'Mizo Youth of America' (M.Y.A.) an vuah. MYA hi USA-a Mizo pawl ding hmasa ber nia hriat a ni. -Ed.)