I Lung A Lengin I Khua A Har Ṭhin Maw?

12/07/2020

Mite anga țhian ngah ve loh avangin, hlim lo bik riaua inhriain i khua a har ru țhin em? Mite anga hmelhriat duhsaktu neih tam ve loh avangin mal bik riau anga inhriatna i nei țhin em?

"Hring nun hi hetiang chiaha hman tur hi a ni" tih dan a awm lo a, hmang nuam bik riau nia i hriatte khan anni aia hmang nuam bik angin an hmu ran thei bawk che! Tin, hring nun hi a nuam thei ang bera hman chiam tur a ni kher lo a, chhungkua leh vua leh vang intihngah chiam te, țhian leh hmelhriat intihngah viau te, țantu leh pawlho intihneih țhat chiam te hi a pawimawh ber lo bawk. Hring nun hi "intih viau leh intih chiam" lam a ni lo a, "nih ang leh nih dan tura țha taka nih mai" lam a ni zawk. A pawimawh ber chu, mahni nihna leh mawhphurhna dik hria a, khawhar tak chung pawha mawhphurhna hlen chhuah hi a ni.

Mal bik leh khawhar bik nia i inngaih lai pawh khan, i mawhphurhna dik hriaa i tih karh karh chhung chuan, inti-hmang nuam bik chiam tam takte aiin hring nun hi dik takin i hmang zawk a, kawng dik zawhin i kal reng tih theihnghilh ngai suh.

Mihring hi lungleng țhin leh khawhar țhin kan ni. Chu lunglenna leh khawharna chu kan tuar chhuak zo lo fo a, inhnemna tur zawngin thil chi hrang hrang kan ti kual vel chiam țhin. Lunglenna leh khawharna hian kan mawhphurhna dik kan hlen chhuahna kawngah leh kan tum ram kan panna kawngah min tibuai fo. Mi hlawhtling ni turin, mi puitling ni turin leh mi zahawm ni turin, kawng tam takah lunglen leh khawhar tuar zo mi nih a țul țhin a ni. Khawvela mi hlawhtlingte leh mi ropuite nun hi thlirin zir mah teh- a nuamah pawh a hrehawmah pawh, an lunglen pawhin, an khawhar pawhin an nih tum leh beisei ram pana kal ngat ngatte an ni tlat. Hlawhtlinna leh hmasawnna tam zawk hi chu, huho leh huau huau lam ațanga lo rah chhuak a ni lo. Mahnia fianriala tih kerh kerhna leh beih fan fanna atanga lo rah chhuak a ni zawk.

I hmasawn zelna tur thlir ran chungin, i mawhphurhna hlen chhuak tura i kalna kawngah leh i tum ram i panna kawngah, thil danga lunglenna leh khawharna-te hi chhel takin tuar la, tuar chhuak la, kal zel rawh. Member i nihna pawl bil ringawt leh Mizo khawvel chhung chauh hi thlir lo la, khawvel puma mite chevel khi thlir la, 'tun' chauh ni loin 'nakin' pawh thlir tel reng la, lungleng tak leh khawhar tak pawhin kal zel ang che.